د.سامح مهران:صوت العرب – القاهرة.
(حالة كرنفالية عامة، فهناك حواة يلعبون بالكرات وآخرين يقفزون من خلال حلقة النار، والبعض على أرجل خشبية طويلة للغاية، وراقصات يرقصون رقصة خاصة بـ"جامايكا" ويتزينن بالريش، وهناك حراس يضعون جميعهم على أعينهم ما يفيد "العور". أنيس فى حمام سباحة من البلاستيك، ويشرب الخمر من الزجاجة وما أن ينطق إلا ويبدأ الحواة فى الانسحاب، فى حين تبقى الراقصات والحراس)
أنيس : موز.. موز.. موز، الستات هنا موز، تحط عيشوة على أم الخير تلاقى نفسك قدام سباطة موز بحالها، فاكهة مسقية بمية نار، تولعك وتوهوجك وترجعلك شبابك اللى سرقوه هناك.
فتاة 1 : هناك فين مستر أنيس؟
أنيس : هناك يعنى اللى موش هنا، يا جميل يا بو وسط فيه زمبلك.
فتاة 2 : مستر أنيس...
أنيس : يا عيون مستر أنيس، يا قلب وفشة وكبدة مستر أنيس، طالعة من بقك نغم.. مستر أنيس، قوليها كمان، قولوها كلكم.
فتاة 3 : أنت ما قلتش ابدا ابدا، إنت منين مستر أنيس.
أنيس : أنا يا ستو أنا، من بلاد..........
فتاة 4 : تركب الأفيال!!!
أنيس : لأ، كده ها نقلش سوا، أنا من بلاد تشوفيها من بعيد تلاقى أهرامات، تقربي لى قوى قوى قوى، تكتشفى أنها جبنة مثلثات، الكل بيقطع فيها وياكل براحته عالآخر.
فتاة 1 : وأنت أكلت الجبنة مستر أنيس؟
أنيس : إلا أكلت، دا أنا أكلت وأكلت وأكلت، أكلت بالتلاتة بس أخدت المثلث اللى يخصنى، وسبت بقية المثلثات، عشان غيرى ينوبه من الجبنة نايب، آه القناعة كنز لا يفنى.
وحد الله بينى وبين الطمع
فتاة 2 : أنت شخصية عظيمة مستر أنيس
أنيس : كانوا هناك بيقولولى يا قزعة، بس خلاص سماح يا عبد الله ياخويا سماح
فتاة 3 : قلبك كبير مستر أنيس
أنيس : ويساع من الحبايب ألف (يقبل الفتيات جميعهن على التوالى) ولو ألف وواحدة، برضك يساع
فتاة 4 : جيت هنا جامايكا ازاى مستر أنيس؟
أنيس : أهيه دى أغرب حكاية، جبت الخريطة، وغمضت عينيا الاتنين، وحسست عليها (يتحسس الفتاة.. ضحكات) وصباعى فضل رايح جاى على الخريطة، وعلى حين فجأة هنج فتحت عينيا، لاقيت صباعى فوق جامايكا عدل، رحت بايس الخريطة من بقها (يقبل الفتاة) وقلت على بركة الله
فتاة 1 : دمك خفيف مستر أنيس
أنيس : دى بقى خلقة ربنا، ما هو موش هاياخد من بنى آدم كل حاجة، برضة بيسيبلك حتتك، العلامة التجارية بتاعتك، حاكم كل حى فينا له علامته التجارية
فتاة 2 : مستر أنيس I want to kiss you
أنيس : No Darling No، إلا كيسى، كيسى محدش يقربله ولا يهوب ناحيته، أنا راجل عصامى، الدنيا شالت فيا وحطت وكل أموالى جمعتها بشرف وأمانة.
فتاة 3 : موش فاهمين مستر أنيس بتقول إيه؟
أنيس : وعمركو ما ها تفهموا
فتاة 4 : (تقبله) ليه عمرنا ما هانفهم ؟
أنيس : عشان الموز اللى محاوطنا من كل ناحية، واللى استثمرت فيه كل أموالى فى المزرعة الطويلة العريضة دى، براه غير جواه، وأنا وانتى، وهيه وهيه وهيه، موز موز موز، يعنى الـ Kiss بتاعتك غرضها الكيس بتاعى، هاوو
فتاة 1 : إحنا بنحبك يا مستر
أنيس : وأنا بموت فيكو كلكن ، موزايه، موازيه
فتاة 2 : يبقى لازم تشيل كل شك من ناحيتنا فى قلبك
أنيس : أنا أشك إذن أنا موجود، يا للا ياختى انتى وهيه، بيتك بيتك بيتك، ابقوا تعالوا بكرة، عكرتم مزاجى ربنا يعكر مزاجكو، انتو لسه ما مشيتوش ياللاه بره
(تخرج الفتيات إلى خارج خشبة المسرح، ويخرج أنيس من حمام السباحة فإذا هو قصير للغاية، يلبس أرجل خشبية فيبدو طويلا) عارف ومتأكد إنكوا بتفتشوا ورايا، وطبعا مستخبيين ورا شجر الموز دلوقت، أنا معجزة، سامعين معجزة، طبعا هنا محدش مؤمن بالمعجزات، بس أنا معجزة ومعجزة كبيرة قوى قوى قوى، عاوزين تعرفوا الحقيقة زى ما حصلت بالظبط، خدوها واحكوها للكبير والصغير فى جامايكا، ذيعوها وانشروها فى كل زاوية وناحية، خلوها تحت جلدكم، واحلموا تحصلكم زى ما حصلتلى تمام.
(يتوجه للجمهور زمان وأنا شاب فقير كنت بتاجر فى القماش، من قرية لقرية، ومن زقاق للتانى، كنت شايل على كتافى توب قماش تقيل جدا جدا، والدنيا حر موت، وهووبه جه نسر كبير وخطف التوب وخطف مستقبلى معاه، صاعقة وحطت على دماغ اللى جابونى، توب القماش كان بالدين، يعنى أبيعه وآخد حسنتى، وأسدد لتاجر الجملة اللى أمه يهودية وأبوه أرمنلى، اعمل إيه أعمل إيه؟ رحت اشتكى للمحافظ، طبعا الراجل جاب إيد ورا وإيد قدام، وقاللى ما ليشي فيها دى، طب تاجر الجملة هايطبق فى زمارة رقبتى، وموش بعيد يفكر إن لا فيه نسر ولا دياولو، يعنى مسيرى للعمبوكة، مفيش كلام، تقوم تعمل إيه يا أنيس، تعمل إيه؟ رحت واخد بعضى وناطط على مركب، مرينا على بلاد بعيدة، بس مفيش شط راضى يحضن المركب، فضلنا فى وسط البحر أيام وليالى ما تتعدش، لا فيه زاد ولا زواد، كنا خلاص هانموت من الجوع والعطش، واللى زاد وغطى، المركب اتخرمت، يادى الحظ الأسود، منين ما روح ماسك فى ديلى ومتبت، لكن فجأة، تاتاتاتا، ظهر النسر الكبير، كان لسه شايل توب القماش بتاعى، نزل فى خرم المركب نشان، فسده طوالى، وكل اللى فى المركب نجيم، والعبد لله كان سبب، سبحان الله مسبب الأسباب (ما يسرده أنيس مصاحب بـanimation على شاشة سينما فى الخلفية، وما أن تختفى المشاهد إلا ويظهر الضل من خلفها طويلا وعريضا بشكل مبالغ فيه) .
الضل : (عبر البلاى باك) انت بتضحك على روحك وإلا بتضحك على مين؟
أنيس : إيه اللى جابك هنا بعد كل السنين دى؟
الضل : النخع اللى عمال تنخعه هوه اللى جابنى
أنيس : ناوى تفضحنى؟
الضل : أصل أنت تجاهلتنى فى الحكاية والرواية يا صاحبى.
أنيس : يا حبيبى دورك انتهى، أنت حتة ضل لا طلع ولا نزل
الضل بس عوضتك عن حاجات ومحتاجات كتير كانت ناقصاك
أنيس : ما تنساش إنى أنا اللى لميتك وكنت مرمى على الأسفلت لا ليك عينين ولا ودان ولا حتى بق.
الضل : اديتك عقلى وروحى وكمان طولى يا قصير قزعه
أنيس : اللى يدور عليك يلاقيك أقصر منى، بس هيه الشمس وهيه بتغرب، تعمل اكتر من كده
الضل : برضه، حقيقتك هاتفضل عندى وبس، ومهما تحاول تخبيها موش هاتعرف، ها تلاقيها قدام عينيك كل ما تجيى تنام، يا للا عيش حقيقتك، وخلى الناس كلها تشوفها وتعرفها
أنيس : لأ، موش عاوز أشوفها تانى (يجرى أنيس ناحية الشاشة وينزل على ركبتيه) أوعى تكون ناوي تعمل كده فياكل يوم ، أرجوك أرجوك (يبكي) موش كل يوم تعمل فيا كده، أرجوك أرجوك (يبكى).
إظلام
(إضاءة خافتة على شقة معتمة بلا نوافذ. وهناك أحواض زرع داخلها شجر الصبار، وبين هذه الأحواض هناك علم مصر مرتفعا)
أنيس : ادخل برجلك اليمين
الضل : برجلى اليمين ازاى وانت اللى شايلنى!!
أنيس : آه صحيح، كأنى شايل هوا (ينزل الضل من على كتفيه، الضل معطيا ظهره للجمهور)
أنيس : دلوقت هاعملك مكياج بتاع محترفين (يزيح أنيس القناع الأسود من على وجه الضل الذى ينهض على قدميه ويبدأ فى تأمل المكان).
الضل : أنا فين؟ وإيه المكان الغريب ده؟
أنيس : لأ أوعى تقول موش عاجبك
الضل : أنا كنت هناك فى الشوارع والميادين، فى الحارات وقدام القهاوى سامع وشايف الدنيا وما فيها، وفى الآخر اتزنق معاك هنا هو! عملت فيك إيه؟ ذنبى إيه؟
أنيس : الدنيا مليانة خطافة وخطافين، ومن ناحيتى معرفتش أخطف أى حاجة
الضل : طبعا، قلت أخطف ضلى
أنيس : إيه النباهة والنصاحة دى
الضل : يعنى يا ربى، يوم ما اتخطف آجى المكان البائس ده، وكله كوم…
أنيس : (مقاطعا) إيه تانى؟
الضل : البيت مفيهوش واحدة ست
أنيس : آه، حطيت صباع جوه جرحى وبتنقور فيه
الضل : يعنى مبقاش ضل إلا ليك أنت دونا عن الناس كلها
أنيس : موش عاجبك فى إيه؟ قوللى، خد بإيدى، يمكن أصلح من نفسى، وأعالج عيوبى
الضل : عندك حاجات كتير ما تتصلحش، وكتيرة جدا جدا جدا
أنيس : طبعا، هاتبتدى تشركنى وتطلع فيا القطط الفاطسة
الضل : لا قطط ولا كلاب، بس كان لازم أبقى ضل لواحد أطول منك بتلاتين أربعين سنتى، أغنى منك، وساكن فى فيلا فيها سومينج بول، متجوز واحدة، وبيلعب بديله مع التانية، وأنا بقى بين الاتنين أدحرج وأجرى، تغيب حضرتك أسد أنا الفراغ، ويبقى نفعت واستنفعت.
أنيس : ضل بورجوازى، شكلك الخيانة فى دمك، شقى وإبن حرام مصفى
الضل : شد على بوقك بلاستر، انت اتولدت فى الدنيا عشان تتخان
أنيس : هاسد ودانى، وهات يا حمار
الضل : مهما تعمل، صوتى هايفضل يتنطط جواك، ويضرب فى صدرك وعقلك كمان، عشان إنت قله،نص متر حاجة كده بتزحف على الأرض، وشوية وهاتاكل من الزبالة ، معلش موش لاقى كلام تانى أوضح بيه قصدى
أنيس : نعيم الدنيا، لا يقاس بنعيم الآخرة
الضل : تكبير
أنيس : أخرج بره بيتى، خلاص زهقت منك، أنا اللى محقوق إنى لميتك من الشارع، دا بدل ما تواسينى، جاى تتمرد عليا وعلى عيشتى، لازم ترجع مكانك مرمى عل الأسفلت
الضل : ما كننت تسيبنى فى حالى، جبتنى معاك هنا ليه؟ وعشان إيه؟ عيشتك ضنك وبتعض فى الأرض، وموش لاقى اللضا، وشكلى هاشحت معاك. يارب، موش كنت أبقى ضل لواحد طويل، وشعره أصفر وعينيه زرق، ومتجوز جورجينا وإلا ليليت وإلا إيلينا مارينوفيتش حتى
أنيس : حِى العلم، حِى العلم، انت ضل لواحد مصرى، سبع تلاف سنة حضارة، أهرامات، معابد، أبو الهول، متحف السكة الحديد، وأوعى وشك للقطر يأكلك
: كحروت مكحرت بس بق على الفاضى والمليان، صحيح على رأى المثل، عريان الـ… عريان الـ… معلش أصل الكلام جديد عليا، ساعدنى يا أنيس أرجوك، عريان الـ… أنا عرفها وسامعها كويس، عريان الـ…. يتئمز تئميز ويسأل باب الخمارة منين
أنيس : ضل ناقص رباية وتعليم، جاهل، لما أنت ما تعرفش المثل بتقوله ليه؟
الضل : اسمع، احنا موش هانعيش كده ناقر ونقير
أنيس : فى دى عندك حق أكيد
الضل : يبقى لازم نتصالح
أنيس : باقول كده برضه
الضل : خلاص قوم افتحلنا قزازة بيرة مشبرة نشربها عل البنانى
أنيس : ما بشربهاش، وما بروحش خمارات من أصله، ارتحت
الضل : يا راجل، دى ليها مفعول السحر، تاخدها قبل الغدا كده وأنت قاعد قدام النيل، وفى وشك خبط لزق مُزة حلوة، تنزل تزغزغ روحك، وتزيح الغم والهم اللى راكبك
أنيس : بيرة ومزة حلوة، يا بنى دا كفر اللى بتقوله ده
الضل : (ينقض على رقبة أنيس) يا أخى فقعت مرارتى، أمال عايش ليه، عايش ليه؟ لا ستات، ولا حتى كوباية بيرة مشبرة، عايش ليه؟ جننتنى، وقفلتنى منك ومن خلقتك
أنيس : رقبتى، هاتخنق، عشان خاطرى، موش قلنا نتصالح
الضل : نتصالح، أيوه، عشان كده بس هااسيبك النوبة دى، بس إزاى أبقى ضل لواحد معندوش واحدة ست، أوعى أكون ضل لواحد موش اللى هوه (ينقض على رقبة أنيس مرة أخرى) يا لهوى هوه إنت منهم؟ يا فضيحتى يانى، يا جرستى ياختى، انت منهم؟ (يضغط على رقبة أنيس) مصيبة وحطت على دماغى، كده عرفت جايبنى هنا ليه، لكن دا بعدك يا بعيد، يستحيل، ومن رابع المستحيلات كمان، عاوزنى أبقى ضل لواحد نص نص
أنيس : حِى العلم، حِى العلم، وهدى أعصابك
أول ما تحس إنك متضايق، تحيى العلم، جسمك يركلس عل الآخر
الضل ليه؟ إزاى؟ عشان إيه؟
أنيس : (أنيس يلف خلف الضل، ويبدأ فى عمل مساج للضل) التضحية، عشان غيرك يعيش، ما تقولش إيه اديتنا مصر، قول هاندى إيه لمصر
الضل : أبعد إيدك عنى، جسمى بيقشعر، كلامك موش لادد عليا
أنيس : كلامى ما عجبش حتى مشمش
الضل : ويطلع مين مشمس ده كمان؟
أنيس : مشمش، القط بتاعى، ربيته أحسن تربية، لكن ما طمرتش فيه العشرة، هرب وسابنى لوحدتى ديه
الضل : قط عنده دم، فاكره زيك إياك، طبعا خرج يدور على قطة بيضة رومى، وزمانه دلوقت متهنى، الدور والباقى عليا وعلى بختى المنيل
أنيس : أدور لك شوية مزيكة تهدى أعصابك
الضل : هاتِ ما عندك يا هذا؟
أنيس : كد هوه، باللغة العربية الفصحى؟
الضل : عشان تعرف إنى موش أى اى ولا زى زى
أنيس : يعنى مستعد تسمع وتشوف
الضل : على أتم استعداد
أنيس : (يرقص ويغنى أغنية بوسى) آه يا دنيا، آه يا دنيا، ماشيلنا بالمقلوب يا دنيا، تعبنا يابا عشان غلابة، لفى بينا يا دنيا، هاتينا يمين شوية، هاتينا شمال شوية
الضل : بس، وقف هنا، هيه دى، هاتينا شمال شوية، الزتونة هنا هوه
أنيس : لأ، دا بعدك
الضل : موش قلنا نتفاهم
أنيس : ماشى كلامك، نتفاهم
الضل : ولعلى سيجارة
أنيس : ما بدخنش
الضل : أكيد عشان تموت بصحة جيدة
أنيس : يا عم الضل، سيبنى فى حالى، دا أنا ميت بالحيا من ساعة مااتولدت
الضل : إلا صحيح، إنت عمرك كام سنة؟
أنيس : خمسة وتلاتين سنة بالتمام والكمال، النهاردة عيد ميلادى
الضل : خدها منى نصيحة، مع إنك ما تستاهلش، اعتبر نفسك بتتولد النهارده من أول وجديد
أنيس : إزاى بس؟ وأنا إيدى وجسمى الاتنين أقصر من بعض، تفتكر فيه أمل؟
الضل : الفلوس، الفلوس يا بنى آدم، لو إنت قصير، تقف عليها تبقى أطول راجل فى العالم، الفلوس تطولك فى عينين الناس، وتحليك وتهندسك ولو كنت قرد مسلسل
أنيس : وها تجيى منين الفلوس؟ ما تزورش جيبى أبدا، أنا مالياش أى لازمة فى الدنيا (يبكى)
الضل : أرجوك، بلاش البكاء على راس الميت، الدمعة ها تفر من عينى، ما تلعبش على أحاسيسى، أرجوك لازم واحد فينا يبقى بارد وعينه ما بترجفش وقلبه بلاستيك
أنيس : شوف إزاى صعبت عليك………
الطفل : ما قدرش أنكر إنك صعبت عليا بصراحة، لكن خدها منى بناءً على تجربة، لما تحس إنك ما لكشى لازمة فى الدنيا يا أنيس، افتكر دايما سواقين الميكروباظات
أنيس : سواقين الميكروباظات؟
الضل : طبعا سواقين الميكروباظات، إنت شخص مهم جدا بالنسبة لهم، هما اللى بيتخانقوا عليك فى الموقف، إنت شخص مهم قوى يا أنيس عند سواقين الميكروباظات
أنيس : يعنى أنا شخص مهم؟
الضل : طبعا، بص لنص الكوباية المليان، بس أوعى تقوللى ما عندكش كوباية
أنيس : فشر، عندى طقم كوبايات بحاله
الضل : إجرى هات واحدة (يخرج أنيس ثم يعاود الظهور حاملا كوباية)
أنيس : الكوباية أهيه
الضل : حلو خالص جدا، بص فى نص الكوباية المليان زى ما قلتلك واسمع وشوشته
أنيس : (يضع الكوب على أذنه) آه، فعلا، فيه صوت جاى من بعيد
الضل : (عبر البلاى باك) يا أنيس يا أنيس، يا قاهر الخرفان والمعيز سوا سوا
أنيس : أيوه، هوه ده أنا
الضل : لازم القاتل يبقى المقتول، والجانى يصير ضحية، والحامى يرجع حرامى زى ما كان
أنيس : بس كده الفوضى تعم والفكر يشت
الضل : ما هو لازم، عشان إنت وضلك محدش يعرف يفرق بينكو، سامع؟
أنيس : سامع
الضل حافظ؟
أنيس : حافظ صم
الضل : خلاص، نام يا حبيبى نام، والصباح رباح
إظلام
(أنيس على كرسى هزاز، مستغرق فى النوم لدرجة الشخير.. الضل يروح ويجيىء... ثم يتجه لإيقاظ أنيس)
الضل : إصحى، فوق، معندناش وقت نضيعه
أنيس : يا فتاح يا عليم، يا رزاق يا كريم، كنت فاكر إنى بحلم (ينهض أنيس من على الكرسى الهزاز، فيبدو مرتديا روب دى شامبر يظهر ملابسه التحتية، وفوق رأسه كاب عسكرى، وفى قدمه بيادة)
الضل : إيه اللى إنت لابسه ده؟
أنيس : لبس النوم، روب دى شامبر، غريبة دى؟
الضل : بس إنت لابسه عل اللحم
أنيس : هوه اللى حيلتى، اشتريته من البالة، بتاع راجل غنى جدا جدا جدا فى فرنسا، بس مات، نصيبى وقسمتى بقى، الدنيا حظوظ
الضل : طب الروب وعرفناه، طب الكاب والبيادة؟
أنيس : الله يرحمك يا بويا، كان راجل عسكرى، عليه شخطة ترج البيت رج
الضل : أيوه، أيوه مفهوم، برضه مش فاهم لابساهم ليه؟
أنيس : لأ وأنت الصادق، هما اللى لابسينى، الله يرحمه مات ودخل قبره من هنا، وعاديك، كلبش فى عقلى وروحى وجسمى، أصلك ما تعرفوش كان عليه هيبة تخليك تترعب من جواك، لما كان يمشى فى الشارع.. الشارع يبقى سكتم بكتم، هُس هُس، والجيران يقفلوا الشبابيك كان رحمة الله عليه، ليه شنة ورنة.
الضل : مالك بتترعش كده ليه؟
أنيس : (هامسا) حاسس ( يتلفت حواليه) إنه بيراقبنا دلوقت
الضل : لأ لأ، دا إنت Case
أنيس : المؤمن Case ، فطن هاهاهاى، كفك
الضل : دمك خفيف والله
أنيس : خفة الدم هية اللى فاضلالى، باضحك على أى حاجة وكل حاجة حتى على نفسى، يا للا محدش واخد منها حاجة، كله بيطلع خسران فى الآخر، دا لو أنت أغنى واحد فى العالم، ها تسيب كله لغيرك
الضل : ومين سمعك، الكفن ما لوش جيوب.
أنيس : (يبحث عن خرقة، يعثر عليها، ثم يبصق فيها، ويخلع الكاب ويبدأ فى تلميع النسر الذى فى مقدمته، ثم يفعل نفس الشىء مع البيادة)..
فعلا، الكفن ما لوش جيوب
الضل : إنت بتعمل إيه؟
أنيس : كل يوم مع طلعة الشمس، لازم أخليهم يبرقوا كده ويضووا، عادة فضلت معايا من صغرى، أبويا ربنا يبشبش الطوبة اللى تحت راسه، كان بيقوللى دول عزة، كرامة، عنوان للراجل الدكر (يقف ويدك بقدمه الأرض) هاه، هل من مبارز أنا فى حالة دلوقت، خلى بالك.
الضل : وبارز مين بقى على كده؟
أنيس : ما خلاش، كان أكرمك الله بيبارز دبان وشه
الضل : وطبعا كان بينتصر؟
أنيس : ابدا، كان ياخد الطريحة من دول، تقول خلاص موش هاتقومله قومة، لكن سبحان الله، تلاقيه تانى يوم أسد ولا كأن، بس إيه، نشر إل ولا كأن دى فى البلد بحالها، جبروت الله يرحمه
الضل : يعنى ما انتصرش فى ولا عركة
أنيس : من المؤسف أشد الأسف، جه اليوم اللى انتصر فيه وكسب، ومن فرحته طب مات، موش مكتوبله، إقراله الفاتحة، إقراله
الضل : هو المكان اللى احنا فيه ده، شقة والا قبر؟
أنيس : الناس وحشة يا صاحبى، البعد عنهم غنيمة، لا عاوز أشوف حد، ولا حد يشوفنى، رحت سادد الشبابيك، بس ساعات لما أحب اتسلى، أحط ودنى على الحيطة وأسمع أصوات، معرفش بتاعة مين، بس أقعد الضم الأصوات ديه فى خيالى، وأبنى قصص وعالم، دى هوايه عندى
الضل : (وهو يمشى متفحصا المكان يكتشف وجود فتحة فى أحد الحوائط)، إيه الخرم ده؟
أنيس : تعالى حيى العلم الأول، عشان أتأكد من وطنيتك، وبعيدن أقولك حكاية الخرم.
الضل : لأ، قوللى حكاية الخرم الأول
أنيس : وعزة جلال الله، ما نا قايل إلا لما تحيى العلم الأول، دا عربون الثقة بينى وبينك (يشد أنيس الضل من يده ويقفان أمام العلم، ويؤديان التحية) قول ورايا، بلادى بلادى بلادى، لك حبى وفؤادى
الضل : (بعدما يكرر النشيد) وبعدين؟
أنيس : خلاص، مفيش بعدين، أنا حافظ المقطع ده بس
الضل : فين مصر يا أرض النعيم؟
أنس : قولتلك نسيت باقى النشيد، ويمكن النشيد هو اللى فاتنى وسابنى، معدتش عارف حاجة فى أى حاجة
الضل : خلينا فى خرم الحيطة
أنيس : (يتنهد) لآه، الخرم، ده لا تقوللى الشوتايم، ولا النت فيلكس ولا والت ديزنى نفسه، اضربهم فى الخلاط وبص من الخرم ومتع بصرك (ينظر الضل من خلال فتحة الحائط)
الضل : إيه ده؟ فيه واحدة بتقلع هدومها، يا جماله يا جماله
أنيس : أوعى بقى، عاوز بصة
الضل : استنى على رزقك، ما تبقاش رزل
أنيس : ما ليش دعوة، عاوز بصة
الضل : اتفضل بص (أنيس يحضر مسند خشبى، يصعد عليه وينظر من خلال فتحة الحائط)
أنيس : (يلف ساقيه حول بعضهم) أخ خ خ، يا لهوى يابا، يخرب بيت حلاوتك، أنا خلاص هاسورق، روحى بتتسحب مني ، أكيد ها يغمى عليا، عشان خاطرى، رقعلى صداغى عشان أفوق، رقعلى صداغى أرجوك (يبدأ الضل فى صفع أنيس على وجهه)
الضل : هاه، فقت والا لسه؟
أنيس : فقت نص نص، إيدك موش تقيلة زي الله يرحمه
الضل : دا انت متعود بقى على ترقيع صداغك
أنيس : كلام فى سرك، حضرة الصول حنتريش، أبويا، مانا ما قلتلكش، اسمى أنيس حنتريش، هوه اللى عمل الخرم ده فى الحيطة، وكان دايما يبص منه، آجى أنا بقى أعمل زيه، من شابه أباه، ما أنت عارف وراسى، يقوم يرقعلى صداغى، واحشنى قوى قوى قوى أبويا
الضل : هيه الست اللى جنبنا دى كانت على أيامه؟
أنيس : لأ، طبعا، بس الشقة دى مرزقة، جنة ربنا فى أرضه أشكال وألوان، حور عين، بس كله كوم والوليه اللى اسمها قيمة دى كوم تانى، ما ليه عليا الدنيا، الحمد لله إنك موجود معايا
الضل : ليه؟
أنيس : خايف من البص يغمى عليا، ومحدش يرقعلى صداغى وأموت فيها، ألف حمد وشكر ليك يارب
الضل : وتطلع مين الست قيمة دى؟
أنيس : ست محترمة وكمل، ما لية عليا حياتى، مقدرش أعيش من غيرها، ست تغنيك عن كل ستات العالم
الضل : قلتلها الكلام دوه؟
أنيس : لأ طبعا، أنا بابص بس
الضل : الله يخرب بيتك وبيت اليوم اللى شفتك فيه، روح خبط على بابها، واتعرف عليها، يا جت يا راحت
أنيس : بقولك ست محترمة، وكمل، متجوزة
الضل : (وهو ينظر من خلال فتحة الحائط) فعلا، دى معاها راجل، الله الله الله، دى وحش كاسر، الرجل راح، عفية بزيادة، كلته أكل، مرونة وحيوية، شقلبظات، أوووه، السرير ما استحملش ووقع، والراجل اطضحضحه
أنيس : ماهيه دى المشكلة، كل يوم تتجوز واحد وطضحضه كده وتكسر ضهره، هوه والسرير سوا سوا
الضل : كل يوم كل يوم؟
أنيس : زى ما بقولك كده، يومياتى على الله تتجوز، ما بتفوتش يوم، والعمر موش بعزقه يا صاحبى
الضل : اللى زيك عايش ليه؟
أنيس : أنا أبص إذن أنا موجود ( يضرب بالبيادة على الأرض)
الضل :انت من سكة وأنا من سكة تانية خالص (يفتح باب الشقة)
أنيس : رايح فين يا مجنون إنت؟
الضل : رايح أجيب الديب من ديله
أنيس : هاتضيع عمرك وعمرى معاك، مفيش فايدة، قافل ودانه، فاكر روحه أبو عرام، كان غيرك أشطر، يال ما تتسمى، ما كنت سيبتك متلقح عل الأسفلت، بس أرجع وأقول، أنا اللى جبت دا كله لنفسى (يتجه إلى العلم ويؤدى التحية) الله أكبر، الله أكبر، الله أكبر فوق كيد المعتدى (يتوقف) ما كنت كافى خيرى شرى
الضل : (صوته من الخارج) اتفضلى يا ست قيمة، خطوة عزيزة والله
قيمة : (صوتها من الخارج) يا صباح الخير يا صباح النور (تظهر قيمة) يا ساتر، قلبى اتقبض، المطرح ريحته وحشة، قبر (للضل) إيه يا خويا اللى إنت واخدنى ليه ده؟ (تتأمل المكان) هما الفراعنة عدوا من هنا؟
الضل : عندك حق، أدى يا ستى مومياء متحنطة بس بتتكلم كتير، وبتتنفس وبتاكل تين شوكى
أنيس : حمارتك العرجة ولا سؤال اللئيم، الاستغنا يا أستاذ، الاستغنا يا هانم، عامل اكتفاء ذاتى، باكل من زرع ايديا، الايد البطالة نجسة
قيمة : وما جالكشى إمساك يا سى الأستاذ
أنيس : مزمن وحياتك يا مدام قيمة، بس دى ضريبة الاستقلال، حيى العلم، حيى العلم
قيمة : (تلتفت للضل) دآ، تراللى خاص
الضل : طايره منه، بس شطارتك وهمتك معاي نثبتله عقله فى راسه وأهو ينوبك ثواب
قيمة : والله يا أستاذ عملت خير كتير ( ثم بطريقة مغناة) فوق فوق فوق ما تتصور، وطول عمرى عليه يا عينى بتدور
الضل : الله يا ست الله (هامسا لقيمة) إلا عملتى خير بس؟
قيمة : فشر، وذنوب كتير كتير، فوق فوق فوق ما تتصور، وطول عمرى عينيا عليها بتدور
أنيس : خير وذنوب، تيجى إزاى دى؟
قيمة : تعمل الذنب من دولى، وبعدين تعمل خير يغسل الذنب، سخن وساقع، صيف وشتا، حر موت وبرد زمهرير، وهكذا دواليب
أنيس : قصدك دواليك
قيمة : خليها دواليب، عشان كله يبقى فى المستخبى، فتح مخك تاكل ملبن
أنيس : الظاهر طلعتى متحللة خالص يا ست إنتى
قيمة : ومين سمعك، أنا والجنيه ماشيين مع بعض خطوة خطوة، سنة سنة، كل ما يعوموه، أعوم وياه، إيد بإيد، آه زى ما بقولك كده، الدراع فى الدراع، تقولشى عاقدين علينا وكاتبين كتابنا، شاكب راكب ابن الكلب، كسر نفسى، وذل بدنى
الضل : بس أنيس قاللى إنك متجوزة
قيمة : كنت، كنت متجوزة راجل ملو هدومه، حمش وابن أصول، كان بيغير عليا من الهوا الطاير، ما حرمنيش من حاجة، خلانى قيمة وسيما
أنيس : ودلوقتى؟
قيمة : بقيت يا ولداه سيما بس
أنيس : إمال إيه الرجاله اللى طالعين نازلين من عندك دول؟
الضل : ما تتحمقش على قيمة كده، موش بقت سيما قالتلك
أنيس : يعنى إيه؟ هما دول موش أزواجك؟
الضل : يعنى كل الرجال اللى تاعبينك دول متفرجين
قيمة : اسم الله على نباهتك، ابن كار بصحيح
أنيس : معاكى سيجارة؟
قيمة : إنتى بتدخنى يا بيضة؟
أنيس : لأ، بس طالبة معايا
قيمة : (تخرج سيجارة من حقيبتها، وتضعها بين شفتى أنيس) يا للا، آهوه بجملة الخير اللى بعمله
الضل : يبقى ناوى على ذنب يا جميل
قيمة : حبيبى، كده قوام فهمتنى، هانولف على بعض أكيد (يقتربان من بعضهما البعض)
أنيس : (يجرى يضع نفسه بينهما وبعجرفة) ولعيلى
الضل : ولعى فيه يا شيخة وخلصينى منه
قيمة : حرام كفاية عليه نار الآخرة
الضل : ما يبقاش قلبك رهيف (ملتفا إلى أنيس) أفتن عليك وأقلها بتعمل إيه؟
أنيس : لا والنبى، خلاص، خلاص حرمت، عشان خاطرى
قيمة : قوللى بيعمل إيه شبر واقطع دون
الضل : بس تحلفى ما تتعصبيش
قيمة : وحياتك عندى حابقى سهلة المنال
أنيس : (للضل) أنا اللى لميتك من الشارع
الضل : (لقيمة) تعالى، كان بسلامته بييص عليكى من الخرم ده
(يلتفت لأنيس) هاه، بس، تستاهل
أنيس : (يرتمى على الأرض متخذا وضع الجنين) يا كسوفى، يا كسوفى، أودى وشى منك فين؟
قيمة : يا ابن الجنية يا أستاذ أنيس، دا إنت كده شفت المتفرجين كلهم واحد واحد
أنيس : لأه، لأه، إجابة خاطئة
قيمة : إمال شفت إيه، قول انطق
أنيس : ش، ش، ش، شفت الفيلم كله
قيمة : من أوله لآخره؟
أنيس : متـ، متـ، متأسف خالص، موش موش موش أعمل كدا تانى يا أبله
قيمة : قوم فز يا متحلل، إعملنا كوبيتين شاى
أنيس : معنديش لا شاى ولا سكر يا أبله
قيمة : (تخرج من حقيبتها مفتاح شقتها) اتنيل روح شقتى، تدخل المطبخ، هتلاقى رف على إيدك اليمين، تفتحه، قدامك طوالى الشاى والسكر، تجيبهم وتيجى طوالى تقف زنهار وتدى التمام
أنيس : بس، بس، بس خايف الاقى متفرج كده وإلا كده تانى فى الشقة
الضل " (هامسا لقيمة): الواد ده دور أرضى خالص وبحوره غميقة
قيمة (هامسة للضل): إنت تعرفه بقالك أد إيه؟
الضل : يوم بليلة بس، وفي لياكل حاجة، من طقطق لسلامو عليكو، لكن قلبى موش مستريحله، بيصدر لنا العبط
قيمة : يبقى لازم ننكش جواه يا معلمة، ونعرف حكايته إيه، عبيط وإلا بيستعبط (تلتفت لأنيس) إنت لسه ما رحتش الشقة قلتلك فوريرة
أنيس : مع، مع، مع، معنديش بوتاجاز
الضل : معندوش حتى سبرتايه
قيمة : معلش يا سى الأستاذ، خليها عليك المرة دى، خد أنت المفتاح، وإعملنا الشاى، إلا صحيح، اسم الكريم إيه؟
الضل : أنيس، اسمى أنيس
قيمة : إنت روخر أنيس!! اتنين أنيس، هيه الدنيا مفيهاش أسامي خلاص ضاقت قوى كده؟
الضل : جئت لا أعلم من أين، لكن أتيت
قيمة : أمرى لله، روح يا أنيس جيب السكر والشاى
أنيس : مين فينا؟
قيمة : أنا باكلم الطويل ده، إنت قزعه، تقعد مطرحك
(يغادر الضل خشبة المسرح) تعالى خد، بقى كنت بتبص عليا يا مية من تحت تبن
أنيس : خلاص حرمت، ما عدتش أكررها
قيمة : طب قوللى وما تكسفش، عجبتك كمتحللة؟ تعالى أقعد على حجرى وقوللى
أنيس : (يجلس فى حجر قيمة) أقولك بس فى ودنك
قيمة : متخافش قلتلك، هوا فيه حد معانا؟
أنيس : الحيطان ليها ودان
قيمة : وخرام، وإنت الصادق، قول بقى، عجبتك فى إيه؟
أنيس : (يهمس فى أذن قيمة)
قيمة : هاه، وإيه كمان، آه صح، بجد؟ طبعا شحط محط كده يا سلام..
أنيس آه، هوه دا اللون اللى بحبه
قيمة : دا إنت كانية يا أنيس، صحيح يا ما تحت السواهى دواهى، إلا خد هنا، هو إنت من الذين لم يمسسهم بشر؟
أنيس : كنت سعيد، متهنى، ومتجوز ست كات شايلانى على كفوف كفوف، كفوف
قيمة : ما تسفش فى الكلام
أنيس : كفوف الراحة
قيمة : كمل، وبعدين، هوا أنا هاخد منك الكلام بالقطارة
أنيس : فضلت كل يوم وهيه جاية تجيب شىء وشويات، اشى لحمة واشى خضار وفاكهة، واشى جزم وبدل وكرافتات، وكل اللى النفس تشتهيه، لحد فى يوم ما اكتملت فرحتنا وحبلت، وقعدت أعد الأيام، أعد الأيام، واستعجل نزول الجنين، وجه بسلامته، وياريته ما جه، كانت الطامة الكبرى الواد نزل أسود غطيس، طبعا استغربت واستعجبت وضربت كف على كف، راحت فزت فيا ورقعت بالصوت الحيانى، العرق يمد لسابع جد، جد من جدودك كان أكيد أسود غطيس،، بتشك فيا يا أنيس؟ قلت فى عقل بالى يمكن يا أنيس يمكن أتوحمت على غراب أسود زى ستنا خضرة الشريفة، ظنونك هيه اللى سوده يا أنيس، الست بتحبك، وشارياك بالخضار واللحمة والجذم وخلافه، إيه اللى جابرها يعنى؟ ما عدتش أجيب السيرة دى تانى، لحد ما عدت خمس سنين، بصيت لاقيت الواد بقى أطول منى، خمس سنين وأطول منى، اتجننت، ما بقتش طايق ألعب معاه لا يلوشنى، الواد طلع عملاق، لحد فى يوم ما جالى تعب فى معدتى، ومشيت من الشغل بدرى، قلت أعدى عليها فى الكافية اللى بتشتغل فيه، وهالنى ما هالنى، كان صاحب الكافيه راجل طوله مترين وأسود غطيس، أسقط فى يدى، أى والله أسقط فى يدى، أخدتها على المأذون طوالى، قالتلى لو طلقت هادفعك دم قلبك، رديت وقلت بكل ثبات وعزم وحسم، بينى وبينك الـD.N.A. ، رحت وراحت، إيه بس اللى ودانى الكافيه يوميها، كان زمنا عايشين، يا ريتنى ما عرفت، كانت ماشية، بعد كده وقفت خالص، وضلمت عل الآخر، تصدقى بالله
قيمة : لا إله إلا الله
أنيس : بعت كل حاجة، حتى الهدوم اللى كانت جايبها لى، وبقيت ألف فى الشوارع ألقط رزقى، الشحات له نص الدنيا، فضلت أشحت أشحت أشحت، لحد فى يوم بصيت لقيت الدنيا كلها بقت شحاتين والمهنة باظت وخربت، أرجع وأقول، يا ريتنى ما عرفت يا قيمة، كانت إيديها فرطة بزيادة، أشياء إن تبدى لكم تسؤوكم، صدق الله العظيم
قيمة : دا إنت موش متحلل، دا إنت التحلل بذات نفسه، جاتك نيلة إنت والجنيه داهية تاخدكم إنتو الاتنين، خليتوا رقبتنا زى السمسمة، قوم من على حجرى لتنجسه يا نجس. (تدفعه فيقع على الأرض)
الضل : (يدخل إلى خشبة المسرح) ثلاثة شاى عدالة
قيمة : اسمع، هاسميك إنت أنيس الطويل، والقصير ده أنيس التانى
الضل : يا سلام على المفهومية والنجومية، واللى دخل الغابة وأكل وحوشها، وركب وسيطر (يقدم لها الشاى) اشرب يا سيد الناس وروق دمك
قيمة : أنيس القصير ده، وله سيس، حمل تقيل، وموش هاينفع فى حاجة
أنيس : أنا صاحب الشقة دى، اطلعوا بره انتو الاتنين
الضل : لا يا حبيبى، دخول الحمام موش زى خروجه، أنا كمان ليا فى الشقة دى
أنيس : لأه، دا بعدكم، أنا صاحب الشقة (ينهض من على الأرض) كله يلم هنا عندى ويدى التمام وإلا هادوركم مكتب يا جذم
(يخبط بقدمه على الأرض ويجرى ليحيى العلم، فى حين يذهب الضل بعيدا عن قيمة يهمس فى إذن ونيس)
الضل : اسمع يا حبيب أبوك، اللى حضَّر العفريت يصرفه، لم روحك وسلم نفسه تسليم أهالى، عشان تخضر وتزهره معانا إنت وأنا، قلت إيه يا حبيب أبوك؟
أنيس : إنت حتة ضل لا طلع ولا نزل
الضل : لأ، أنا الواجهة الأمامية وإنت الواجهة الخلفية، اللعبة لازم تبقى كده عشان نمرق ويجيى الخير
أنيس : قلبى موش مطمنلك، شاكلك بياع
الضل : استبينا، خليك إنت الشارى، ويبقى أنت بعت وأنا اشتريت
أنيس : (بصوت عال) ما تلعبش فى دماغى وتلخبطنى
الضل : وطى حسك، إنت وأنا بير غويط، جواه غير براه، موش عاوزين قيمة تنزل فيه، دى وليه فضحية وعينيها بجحة، ولازم تبقى معانا موش علينا
أنيس : تفتكر؟
الضل : أظن
أنيس : يعنى ها يجيى خير من وراها؟
الضل : نجرب، معندناش حاجة نخسرها
أنيس : ماشى كلامك، اتفاقية سلام
الضل : خلاص، ارفع إنت الراية البيضا، وحيى العلم، انت القائد دلوقت
أنيس : أنا القائد هاه؟
الضل : مفهوم، هوه فيه غيرك
أنيس : أخدتها من على طرف لسانى، يا أخى بتعرف تقرا أفكارى
قيمة : بتقولوا إيه سمعونى؟
الضل : كله تمام يا ست قيمة، أنيس القصير استجاب. (أنيس يحضر الراية البيضاء، ويلوح بها، ثم يذهب للعلم ويؤدى التحية)
قيمة : استجاب لأيه؟ هيه دى السرايا الصفراء وأنا موش واخدة بالى؟
أنيس : اسمعى يا قيمة، باقول يعنى، نوسع الخرم اللى موش عاجبك ده، ونفتخ الشقتين على بعض، ويبقى زيتنا فى دقيقنا والخير يعم آه، نتحلى بروح الجماعة، المركب كل مادا حمولتها بتزيد، ولو غرقت لا سمح الله هاتاخدنا معاها للقاع
الضل : (مصفقا): الله، كلام ولا أروع، إحساس بالواجب والمسئولية بياخدنا للزمن الجميل
قيمة : دلوقت متأكدة، أنا فى السرايا الصفرا مفيش كلام (تخلع الشبشب وتلوح به) ما تتعدل يا واد منك ليه، بتشقلطونى بينكم، والله تلاتة أنسله عليكو نسله نسله
الضل : أحبك وأنت غضبان، وأنت حيران، وأنت جعان، وأنت شبعان، أحبك بكل الألوان، واشترى لعمرى ألف عمر وأحبك كمان وكمان
أنيس : (يتقدم بخطوات عسكرية) أنا كلفته يقولك الكلام ده نيابة عنى، يعنى موش هوه اللى بيقول،انا اللى باقول، هوه حياالله لسان حالى يا قيمة وسيما
قيمة : هوه نهار اسود من أوله
الضل : تعالى يا ست قيمة وأنا أفهمك كل حاجة، البسى شبشبك واستهدى بالله
قيمة : (تلبس شبشبها): آجى فين إنت روخر؟
الضل : كلام فى سرك، ما ينفعش حد تانى يسمعه، عن إذنك يا أنيس
(يغمز لأنيس بعينه)
أنيس : خدوا راحتكم، البيت بيتكم
قيمة : (تنتحى جانبا مع الضل) هاه، اشجينى
الضل : الراجل طالب القرب
قيمة : (تشير إلى أنيس): دهووه يتجوزنى أنى؟
الضل : المثل بيقول ضل راجل ولا ضل حيطة
قيمة : دا لازمه سلم عشان يبوسنى
الضل : يا ستى أبقى أشيله على كتافى، كل مشكلة وليها حلال
قيمة : لأ لأ لأ، الناس ها تتمئلس عليا
الضل : اللى ها يسلم ودانه للناس موش ها يخلص، افتكرى حكاية جحا وحماره
قيمة : قصدك يعنى...
الضل : قصدى عشان يبقى فيه حكاية، لازم يبقى موجود الحمار، وأنا وأنت والهوا تالتنا
قيمة : لأ وإنت الصادق، كده يبقى رابعنا
الضل : أصلى ضعيف فى الحساب
قيمة : ومفيش أحسن منى فى الجبر
الضل : وجبر الخواطر على الله
قيمة : على فين مودينا يا هوى
الضل : على أى حتة بعيدة عن هنا، بس بعد ما ناخد حقنا
قيمة يعنى لازم الجوازة دى؟
الضل : كل حاجة لازمها عنوان ويافطة
قيمة : خطتك إيه؟
الضل : نفتح دماغه، نشوف فيها إيه، واللى يعجبنا ناخده
قيمة : واللى ما يعجبناس نخلي زى ما هوه مطرحه
الضل : اسم الله عليكى وعلى حواليكى، اللمبة ابتدت تنور
قيمة : يبقى نسرسبه فى الكلام، والحاجة أم الاختراع
الضل : يا للا بينا (لأنيس) مبروك عليك، قصدى مبروك علينا
أنيس : كنت متأكد أنها ها توافق
قيمة : إنت لقطة، إنت تجننن والنبى لأرقصلك على أغنية لطيفة الأستاذ
الضل : الأغنية دى حافظها، الوصلة دى من نصيبى. (يبدأ الضل فى أداء الأغنية، ثم تدخل الأغنية الفعلية عبر البلاى باك، فى حين ترقص قيمة وتتمايل على أنيس)
قيمة : (بعدما تنتهى من الرقص): كده كتبنا الكتاب وعلينا الجواب
الضل : وأنا داخل بشهادتين
قيمة : حلو، يبقى نقعد ونحدد إيه اللى ليك وإيه اللى عليك
أنيس : بما إنى القائد، فكل حاجة عليكى، وكل حاجة ليا
الضل : ماشى ماشى، كلامك سيف على رقابينا. (يعض على شفته السفلى فى إشارة ذات مغزى لقيمة)
قيمة : كده البيعة خسرانة
الضل : يا جماعة، استهدوا بالله، موش هانعرف نخطى خطوة إلا لما نثق فى بعضينا، عشان نكسب ثقة الشارع والميدان والحتة كلها
أنيس : وليه ده كله؟
الضل : عشان يا قائد نعرف ندخلهم منين
أنيس : وندخلهم ليه، ويدخوللنا عشان إيه، إحنا التلاتة سكر نباتة
قيمة : يا كيادة، الحال مايل والمعايش صعبة، ولازم ناكل عيش زينا زى غيرنا
الضل : الله الله، باسمع مزيكة، لحن جميل
أنيس : انتو ها تاخدونى فى دوكة، وتلفلفونى السبع لفات، اجمع إنت وهيه، وإدوا التمام
الضل وقيمة : (معا): تمام يا فندم (يعظموا)
أنيس : ناس تخاف ما تختشيش، مفيش إلا العين الحمرا بعد كده
الضل : يا سلام يا قائد يا ملهم، جبتها منين دى، هيه العين الحمرا اللى لازمانا وعاوزينها دلوقت أهوه، دى اللحظة الحاسمة
قيمة : يا جماله يا جماله، والله طولت فى نظرى
أنيس : للدرجة دى؟ هوا أنا قلت إيه عجبكم
الضل : (بأداء جروتسكى): العين الحمرا هيه المفتاح اللى كان ضايع ولقيناه، افتح وأدخل المغارة
قيمة : أيون، ادخل المغارة يا قائد (تذهب قيمة لمفتاح الكهرباء وتغلقه)
أنيس : موش شايف حاجة خالص
الضل : إزاى موش شايف كل الوحوش اللى حواليك، حاسب يا أنيس خلى بالله من نفسك يا أنيس
قيمة : (تصرخ): فيه وحش جاى ناحيتك وهايدوسك (يبدأ البروجكتور فى إرسال صور لوحوش متعددة الأشكال)
الضل : (صوته عبر البلاى باك): إنت ميت وإنهم ميتون
قيمة : إنت ميت وإنهم ميتون
أنيس : (صارخا): طلعونى من بيت الرعب ده، هاتخنق، هاموت بجد
الضل : (عبر البلاى باك): إنت ميت وإنهم ميتون (الوحوش تحيط بأنيس بعدما يخرجون من الشاشة)
أنيس : حرام عليكو، دا أنا يا دوب دخلت دنيا
الضل : (عبر البلاى باك): هما دول اللى سرقونا وظلمونا وكسروا قلوبنا ودهسوا أحلامنا، وخلوك زى عقلة الصباع، شوف بيحدفوك لبعضيهم إزاى؟ (يبدأ الوحوش فى تقاذف أنيس فيما بينهم)
قيمة : شوف بيرفعوك لفوق إزاى؟ عشان توقع تكسر رقبتك (ترفع الوحوش أنيس إلى أعلى)
الضل : (عبر البلاى باك): لو نويت تنتقم منهم فى سرك، هايختفوا طوالى
قيمة : (صارخة): انوى يا أنيس، انوى عشان خاطرى، ما تخليش الوقت يسرقك يا حبيبى
الضل : لو نويت تنتقم، ها ترجع إلى دنيا الأحياء
أنيس : خلاص، نويت أنتقم
الضل : نيتك موش خالصة يا بنى
قيمة : إخلص النية يا أنيس، دا أنا ما ليش غيرك وما صدقت ألاقى حيطة أسند ضهرى عليها
أنيس : مين بتتكلم، الست أمينة رزق
قيمة : لأ، بس كارفة عليها دلوقت، إنوى يا أنيس، انتقم يا أنيس أنت أملنا يا أنيس وحلمنا اللى حايتحقق على إيديك يا حبيب قيمة (الوحوش أثناء كلام قيمة ترفع أنيس إلى أعلى ثم يتلقفونه قبل أن يقع على الأرض)
أنيس : خلاص، الانتقام علينا حق حق حق (تضىء خشبة المسرح وأنيس يجلس القرفصاء)
الضل : شفت، كنت ميت ميت، لولا وريتهم العين الحمرا
أنيس : بس خايف يرجعوا تانى ولاد الكلب
الضل : بحركة التفاف سريعة، نكسر سمهم
قيمة : أيوه، هيه حركة الالتفاف وإديله
الضل : قوللى، تعرف إيه عن جيرانك؟
أنيس : ولا حاجة تقريبا
قيمة : يا خويا باشوفك كل جمعة بتصلى وياهم
أنيس : أى نعم، بس محدش بيعبرنى، الظاهر مستقلنى
الضل : يعنى مفيش حاجة كده والا كده لفتت نظرك
قيمة : ركز ياخويا ينوبك ثواب
أنيس : يعني أخترع والا أخترع
الضل : إنت دلوقتى ماشى فى الشارع رايح جاى، رايح جاى
قيمة : (فى أذن أنيس): رايح جاى، رايح جاى
الضل : الناس بتحكى وتتحاكى، وبيوشوشوا بعضيهم
قيمة : طرطق ودانك، أفتحهم على وسعهم
الضل : هاه، سمعت إيه؟
أنيس : أيوه فعلا، فيه بنت فى أول الشارع، رفضت تلبس النقاب، أبوها دب معاها خناقة كبيرة، وضربها بالكرباج، أمها حاولت تتدخل، هددها بأنه هايرمى عليها يمين الطلاق، البت برضه ما سمعتش الكلام، أبوها طردها من البيت، بس البت بتزور أمها فى السر، لما أبوها ما يكونش فى البيت
الضل : البت دى عايشه فين إمال؟
قيمة : بسرعة يا أنيس، عايشه فين، انطق (تصفع أنيس على وجهه) عاوزين ننقذ البت من أبوه الشرانى
الضل : إيه اللى إنتى بتهببيه ده؟
قيمة : ما تتزربنش عليا، قوللى غلطت فى إيه
الضل : انى حودتى شمال خالص، إحنا لازم نقف جنب الأب، باقول تانى، لازم نكسب ثقة الحى كله (بلهجة آمرة لأنيس) اسمع يا قائد، إنت تستنى البت دى لما تيجيى تزور أمها، وأول ما تهل تروح رازعها طوبة فى دماغها، الطوبة تعورها وما تقتلهاش، وانتى يا قيمة، تكونى على الرصيف التانى، واقفة متخفية جوه نقاب، موش لازم حد يتعرف عليكى، وأول أنيس ما يخبط البت بالطوبة، هاتك يا تكبير، فالناس كلها ها تتلم وتكبر وياكى، ويشيلوا أنيس على الأعناق باعتباره حامى حما الديار والأخلاق، يا للا روح فى الشارع وتعالى تانى، شايف إيه، وسامع إيه؟
أنيس : موش عارف، إذا كان اللى هاقوله يهمك وإلا لأه
الضل : كل حاجة ولو صغيرة تهمنى
أنيس : الناس كلها اتبرعت عشان تبنى جامع كبير، بس الفلوس عجزت معاهم والشغل وقف
الضل : إلا تهمنى، دى تهمنى ونص، انت لسه قاعد؟ يا للا انزل خد مكانك يا قائد، الشارع ملكك من هنا ورايح
أنيس : دلوقتى، دلوقتى؟
الضل : لأ دلوقتى إمبارح، اللى جاى كله بتاعنا، قول يارب
قيمة : أروح أجهز أنا كمان، الموضوع عاوز تنكر
الضل : استنى إنتى شوية (لأنيس): إنت لسه ما نزلتش؟
أنيس : نازل، نازل، ما تعوقيش يا قيمة (يخرج أنيس من المسرح)
الضل : بقى اسمعى بقى يا وليه، الصراحة راحة، الخميرة بتاعتك كام؟
قيمة : أنا أنضف من الصينى بعد غسيله يا نور عينيا
الضل : يبقى موش عاوزه تعومى فى مية الدهب
قيمة : إرمى بياضك إنت الأول
الضل : محتاج منك مليون
قيمة : يا حومتى، دا أنت ناوى تأشطنى، هأه يا جدع
الضل : هارجعلك المليون عشرة
قيمة : دا إنت مستريح عل الآخر
الضل : هما المستريحين أحسن مننا فى إيه؟
قيمة : ما تاكلش بعقلى حلاوة
الضل : طب ما تاخدى الفولة من أولها
قيمة : غنى لى، ولا تغنيش عليا
الضل : شوفى يا ست الستات، وإنتى متنكرة، هاتعدى عل الناس المتعطلة فى بُنا الجامع، وتروحى متبرعة بـ 200 ألف جنيه
قيمة : دا أنا أتبرع بدمى ولا قرش أحمر
الضل : الصبر مفتاح الفرج يا وليه، ها تكررى الموضوع، كل ما يعطلوا تتبرعى، وهنا ثقتهم فيكى تبقى للسما السابعة واللى جاى كله، ها تلمسيه بأيديكى، وتشميه بمناخيرك
قيمة : إزاى؟
الضل : هاتى ودنك، وخديها تانى
قيمة : يا ابن الجنية
إظلام
(جامع تحت التأسيس، هناك سقالات، وعمال يروحون ويجيئون، يصعدون وينزلون من على هذه السقالات، هم يحملون على أكتافه وفوق رؤوسهم الطوب الأحمر أو حمولات الأسمنت)
رجل 1 : يا سلام ست عارفة ربنا، يباركلها فى صحتها ومالها قادر كريم
رجل 2 : لولا هية، لا كنا اشتغلنا، ولا الجامع كان ها يكمل
رجل 3 : ست بميت راجل
رجل 4 : بس عينيها بتقول، ومليانة أسرار، بالتساوى
رجل 1 : يا ساتر يا رب، إحنا كده، ما نسيبش حد فى حاله
رجل 2 : ومين سمعك، لازم نطلع فى أى حد الفيران الميتة
رجل 3: (لرجل4) : أديك جبت لنفسك الكلام، ما تاكل عيش وتحمد ربنا
رجل 4 : برضك هاتنى أعيد وأزيد، عينيها
رجل 1 : (مقاطعا): اختشى بقى
رجل 4 : كلمتين وحزقينى، سيبونى أطرشهم عشان ضميرى يرتاح
رجل 2 : طول عمرك بتاع نسوان واقعة
رجل 3 : بيتك وعيالك أولى
رجل 4 : خلاص، طلعتوا كلكو أنبياء وأنا الشيطان
رجل 1 : من أول الست الطاهرة ما هلت علينا، وأنت كأنك لابسك خازوق
رجل 4 : آه، ما هو برضه نفس الخازوق اللي هاتلبسوه كلكو
رجل 2 : هوه إنت عسيت وراها، وعارف اللى ما نعرفوش؟
رجل 4 : لا عسيت ولا ما عسيتش، بس عينيها بتفكرنى بقيمة وسيما
رجل 3 : أعوذ بالله منك يا شيخ، إيش جاب لجاب
رجل 1 : البايظ شايف كل الناس بايظين
رجل 4 : ناموا على ودانكم واستغطوا، خُلص الكلام، لحسن جيبنا سيرة القط، جه ينط (تظهر قيمة منتقبة ولا يظهر منها سوى العينين)
قيمة : عفارم يا رجالة، عاوزين الشغل يخلص قبل رمضان الجاى، عشان نصلى صلاة العيد فى الجامع
رجل 1 : كله بفضلك يا ستنا
قيمة : كله بفضل ربنا، كله من عنده(تشير بأصبعها إلى أعلى) إحنا سبب بس
رجل 2 : ربنا يكرمك ويوسع رزقك
قيمة : ادعولى بالستر كفاية
رجل 3 : يسترها معاكى دنيا وآخرة إن شاء الله
قيمة : إلا أنيس ما جالكوش النهاردة؟
رجل 4 : كل يوم يفط وينط، يقعد ويدون كام شكارة أسمنت، وكان متر طوب أحمر، ويعد ويحسب على صوابعه، موش عارف على إيه دا كله، الدار أمان
قيمة : الحساب ما يزعلش يا خينا، دا مال جاى من عند ربنا ورايح لربنا
رجل 1 : ما تدقيش على كلامه يا ست الستات، حاكم براوى وعامل نفسه أبوالعريف
رجل 4 : يا ريت كل حى يخليه فى نفسه
رجل 2 : أيون، هوه ده مربط الحصان (يذهب على رجل 4): موش برضك
قيمة : جرى إيه يا رجاله، حاسة إن الكلام بيخبط فى بعضه
رجل 3 : ما تاخديش فى بال السيادة والسعادة، المناقرة والمناهدة عندنا تسالى، بتهون علينا الوقت
قيمة : موش عارفة إيه اللى خلى أنيس يعوق
رجل 1 : لو عاوزه أيتها حاجة نقضيها لك، عنينا ليكى
قيمة : تسلم يا ريس، كنت بعته يجيب غدا، لقمة ناكلها سوا
رجل 2 : كرمك زاد وغطى، هانودى جمايلك دى كلها فين؟
رجل 4 : نفسى فى كباب ضانى، وإلا فتة موزة وإلا كام فردة حمام محشى يرموا الجتة والنفسية
رجل 3 : ما نفسكشى تصيف كمان فى بلاد بره
رجل 4 : (وهو يحدق فى عيون قيمة): لأ، نفسى أطول القمر
قيمة : (مرتبكة): آآآ، لو تعرف خلى القمر ينزلك
رجل 1 : أيوه كده، إديله فى جنابه، يمكن يتوب
رجل 2 : أهوه، الأستاذ أنيس وصل (يدخل أنيس على تروسيكل ملىء بعلب الطعام، أنيس يرتدى جلبابا أبيض، وعلى رأسه طاقية شبيكة، وقد أطلق لحيته وحف شاربه)
أنيس : (بصوت عال) متأسف عل التأخير، بس اليوم كان مليان من أوله، مستشفيات وملاجىء وجمعيات خيرية، وكله وصله المعلوم والإيصالات آهيه
قيمة : هوه إنت بتعمل إعلان يا أستاذ أنيس، ما يصحش كده
أنيس : لأ، حضرتك بتعملى خير كتير، وربنا شايف ومطلع، هاندارى ليه؟ وإذا كان الشر طافح، فالخير كمان لازم يورى نفسه ( يبدأ أنيس فى توزيع علب الطعام) خد كل، وأنت وهوه خدوا كلوا وأنا كمان هاكل، والهانم ها تاكل من اللى بتاكلوه، ادعولها ادعولها
رجل 1 : ربنا يزيدها كمان وكمان، سميع مجيب
رجل 2 : كرم لا شفناه ولا سمعنا عنه إلا عند أولياء الله الصالحين
رجل 3 : أهل الجنة، إيديهم بيضا، وقلوبهم بيضا، وصفحتهم بيضا
قيمة : (عبر البلاى باك): الراجل نمرة أربعة ده نمرة بجد، الشك مالى قلبه، وحاسة إنه عرفنى ابن الصرمة، لازم نشوفله صرفة.
رجل 1 : هس، هس، الست الظاهر كده سرحانة فى ملكوته
أنيس : (عبر البلاى باك): كنت فاكر نفسى الأهبل الوحيد، طلعت البلد كلها مليانة هبل (بصوته الحى) الله حى، نور على نور، حباله موصولة، بتتلقى الوعد دلوقت والإجابة (عبر البلاى باك مرة أخرى): تستهلوا اللى يجرالكم
رجل 1 : هو إيه اللى جرى يا أستاذ انيس؟
أنيس : عقبالك، هية كدة مبروكة، روحها بتسيبها وتطلع لفوق، تشوف إيه، تسمع إيه، محدش يعرف، ولا يستجرى يسألها (يتمسح فى ملابسها) بركاتك يا ست بركاتك
رجل 2 : (مكررا فعله أنيس) بركاتك، والنبى ما تحرمينا منها
رجل 3 : والله قلبى كان حاسس، إنها واصلة مع الواصلين، الجامع ده لازم يبقى باسمها، إلا هيه اسمها إيه؟
أنيس : اسمها إيه، اسمها إيه، الجو الروحانى اللى عملته فى المكان نسانى اسمها، يارب المدد من عندك، اسمها إيه؟ آه، افتكرت، اسمها الست هادية مهدى
رجل 1 : الله أكبر، اسم على مسمى
رجل 2 : لازم يبقى اسمها كده، سيماهم على وجوههم
رجل 4 : (عبر البلاى باك): آه يا جزم بألسنة عاوزة القطع
رجل 3 : يا جمال جاه النبى، شايف نور من تحت النقاب
رجل 4 : (عبر البلاى باك): وحياة أمك شايفك عريانة زلط ملط، هاتروحي منى فين؟ (ملحوظة مع البلاى باك تتوقف الحركة ثم تعاود مع انتهاء البلاي باك، وعودة بالصوت الحى) إيدك أبوسها ما تحرمنيش منها والنبى.
قيمة : (عبر البلاى باك): صحيح الأرواح بتتلاقى واللعيبة بيفقسوا بعض فى الملعب، إنت فين يا أنيس، إظهر بطولك وعرضك (يظهر الضل فى ملابس سوداء وغطاء أسود للرأس بحيث لا يظهر منه سوى العينان)
الضل : (يتحرك وكأنه فى متحف الشمع) جرى إيه يا ولية؟ ركبك سايبة ليه؟ كله معمول حسابه، المطبات والمفاجآت لحد الزلازل والبراكين كمان، ما تنسيش، كل الناس دى ضميرها بيصحى ويبات على عبارة واحدة بس، أبويا وأبوك المصلحة، واللى ما تجيبوش الفلوس، تجيبه الليلة الحمرا (يتجه الضل لأنيس) وإنت، ما تقفش زى لوح التلج وتسيح فى ميتك، خش على الواد نمرة أربعة، أيون، الفلحوص اللى فيهم، قوله فى ودنه عاوزك فى شغلانة بعد ما تخلص هنا، خده عندك فى القبر اللى متاويك، اكشف الورق كله، وخليه شريك، ما هو الخير لازم يعم برضك، بس هايقعد ويتصور بكيف كيفه، وهايقر ويعترف إنه شريك فى العملية، وكله على C.D. علشان لو بس فكر يلعب بديله، يا حلاوة التكنولوجيا ياحلاوة
أنيس : (لجميع الرجال): يا للا يا رجالة، ورونا الهمة، الست هادية وراها مشاوير
قيمة : استنى يا أنيس، ما تأخدنيش فى دوكه، فين المقاول؟
رجل 1 : لا مؤاخذة يا ست هادية، المقاول كلفنى أنوب عنه فى أى حاجة النهاردة
قيمة : بس المقاول قاللى، إنه هايكون موجود عشان يستلم دفعة من الفلوس، موش عاوزة الشغل يتعطل، إحنا بنسابق الزمن، موش معقول كده، ورايا مشاوير مستعجلة ومهمة وفيها أرزاق ناس (تفتح حقيبة يدها وتخرج مبلغا من المال) خد 200 ألف أهم، الشغل أهم حاجة الشغل، متأكدة إن الدار آمان
أنيس : (لرجل 1): بس تكتب إيصال أمانة
رجل 1 : على روحى، ليه، هيه الفلوس جايه لى، الست قالتلك الدار أمان
أنيس : الحق حق وما يزعلش، افرض أخدت الفلوس وطيرت
رجل 2 : أعوذ بالله، وإحنا وش كده برضك، دا إحنا بنبنى بيت من بيوت ربنا
الضل : (لقيمة عبر البلاى باك): إدخلى إعدلى المايلة
قيمة : حصل خير يا جماعة، أنيس موش قصده، هوه بس نمكى حبتين المال مال ربنا يا أنيس، موش ناقصين عطلة
الضل : (لأنيس عبر البلاك باك): خش قول جملتك اللى حفظتهالك
أنيس : لأ يا ست هادية مهدى صالح، يبقى نستنى المقاول
الضل : (عبر البلاك باك): خلاص، إداكى الكيو ، العبى الكبيرة بقى وشدى الانتباه، عشان تاخدى السوكسيه يا أبلة هادية مهدى صالح قوى جدا خالص، ارمى الطعم
قيمة : الناس منتظرينا يا أنيس بالفلوس والبازابورتات
رجل 3 : ناس مين، وبازابورتات إيه؟
رجل 4 : (عبر البلاك باك) أوبا، لا روحشى الغيط دا البامية شوكتنى، ولا روحشى الغيط، دا البامية شوكتنى، الشوك طلع والسمك رايح للشبك مفتح عينيه
أنيس : الست هادية مهدى صالح نزيه، عندها مصنع فى بلاد بره، وعاوزه عمال يسافروا معاها على نفس الطيارة
رجل 4 : هيه طيارة واحدة؟
قيمة: كذا طيارة، دول خمسميت ستميت عامل، مصنع كبير قوى، ادعوا ربنا يوفقنا
رجل 4 : مصنع إيه بالصلاة على النبى، أوعى يكون بلاط
أنيس : إيه يا عمنا، هوه تحقيق وإلا تحقيق
رجل 1 : الأقربون أولى بالمعروف يا ست هادية
قيمة : أيوه طبعا، بس إنتو، متهيألى يعنى ما معاكوش فلوس الفيز وتذاكر الطيران، ودى فلوس كتير عليكو، لأن المصنع فى أمريكا
رجل 2 : كام يعنى المطلوب؟
أنيس : (منبريا بالكلام): تلاتين ألف جنيه للنفر
رجل 3 : وماله ، أستلف ، ولما أروح هناك أبقى أسدد
رجل 1 : وأنا أبيع حتتين الصيغة بتوع مراتى، بس أطلع من هنا
قيمة : يا خوانا، خلونا فى الجامع دلوقت
أنيس : وما له يا ست هادية، إسعى يا عبد وأنا أسعى معاك
رجل 4 : من ناحيتى، موش لازمنى سفر، شبعت منه، مرة فى ليبيا ومرة فى العراق، والتالتة فى الكويت
رجل 2 : خلاص، ما لكشى دعوة بينا، حل عن سمانا وخليها تندع
أنيس : بس الأولوية للجامع يا ناس
رجل 1 : موش ها نسافر إلا لما نخلصه
قيمة : ضميرى موش مستريح
رجل 4 : ليه بس يا ست هادية مهدى صالح نزيه؟
قيمة : عشان الجامع عندى أهم من أى بيزنس، يعنى أدخل النار بسببكم، ما كانش لازم تقول يا أنيس
رجل 4 : آه آه، عين بكت من خشية الله
الضل : (لأنيس عبر البلاى باك): إلحقه، خش عليه، ما تسيبوش يكمل، شوية وها يقول أحلى من الشرف مفيش، توفيق الدقن لابسه ابن الرفضى
أنيس : (لرجل 4): إسمع يا توفيق
الضل : (عبر البلاك باك) يخرب بيت غباوتك، ما بتسترش عمرك، ما تقوله اسمع يا باز أفندى أحسن
أنيس : (يخبط رأسه بيديه) إيه؟ إيه إيه؟ سيب دماغى باقولك، إطلع براها، مكلبش ليه فى دماغى؟ سيبنى أشوف شغلى، شينور بيزن فى راسى ززززن (يسقط أنيس متشنجا على الأرض)
قيمة : مسكين يا أستاذ أنيس، ربنا حباه بميزة كبيرة قوى، بس هوه فاكرها بلية، استغفر الله العظيم
رجل 1 : لا حول ولا قوة إلا بالله
رجل 2 : ولا فهمنا حاجة
رجل 3 : والنبى تفسرى يا ست الكل، إحنا ناس على قد حالها
قيمة : (تتجه لرجل 4): الميزة اللى ربنا حبا بيها الأستاذ أنيس، إنه يقدر يدخل جواك، ويسمع صوتك بينك وبين نفسك، ويشوف الناس على حقيقتها من جواها (تنظر فى عينى رجل 4) يعنى بالبلدى حد فيكو ضميره فاسد وموش خالص، والأستاذ أنيس اكتشفه وسمعه من جواه، وعرف وأتأكد إنه موش ناوى خير لنفسه ولا للى حوالين منه، قلبه أسود (تلتفت لبقية الرجال) والراجل ده نمرته أربعة، بس ضميره موش خالص يا رجالة، شوفولكم صرفة معاه، وخرجوه من وسطيكم، لو ناويين خير وسفر وشغل فى المصنع فى أمريكا (مع كلام الرجال المقبل، يتنقل الضل بينهم فى اندهاش)
رجل 1 : عندك حق فى كل حرف وكلمة، دا راجل سو
رجل 2 : مفيش بينه وبين ربنا عمار
رجل 3 : وكمان حقودى، وعاوزنا نفضل هنا جنبه ابن الفاشلة (يبدأ الرجال الثلاثة فى ضرب رجل 4)
رجل 4 : يا جدعان صدقونى، أنا أصيع منكو، ولافف وداير عنكو، العالم ديه نصابة، شغلوا دماغتكو، هوه فيه حد يبقى اسمه هادية مهدى صالح وكمان نزيه، دول نصابين خايبين، بس إنتو أخيب منهم
قيمة : فوق يا أنيس، قوم يا أنيس، قول يا أنيس
أنيس : فوقت وقومت وهاقول
قيمة : شايف إيه بين ضلوع نمرة أربعة يا أنيس؟
أنيس : (يفتح عين ويغلق الأخرى مقتربا من رجل 4): شايف، شايف لأ لأ لأ، بلاش أقول، أحسن بلاش
قيمة : شايف إيه بين ضلوع نمرة أربعة يا أنيس؟ أنا بأمرك
أنيس : مصرة يا ست هادية مهدى صالح نزيه تعرفى إيه بين ضلوع المتهم؟
قيمة : أيون مصرة
أنيس : يا ساتر يارب، يارب أستر على عبيدك، شايف خرابة كبيرة مليانة حيوانات ميتة ومرمية فى مية مجارى، والقمر من فوق وشه بيدمع، بس بدل الدموع دم، بصوا وشوفوا القمر بنفسكو (ينظر الرجال إلى أعلى وتظهر صورة للقمر بوجه يقطر الدم من أعينه فى حين يسقط أنيس متشنجا على الأرض مرة أخرى)
الرجال : (جميعهم): القمر بيبكى دم؟
الضل : (يذهب إلى قيمة): يخرب بيت أبوكو، دا إنتو غلبتونى، الله على أحلى صورة، إبداع
قيمة : (صارخة): إطردوا الراجل نمرة أربعة ده، طول ما هو موجود بينكو أنيس هايفضل يطلع منه بلاوى، بلوة تجر بلوة تجر بلوة، خايفة موت إن الصور اللى شافها جوه الراجل دهوه (تشير إلى رجل 4) تطلع وتكشف حقيقتكم كلكو، حقيقة البلد كلها، إطردوه، إكسروا منخيره وجيبوه الأرض، الخاين لبلده وناسه، الكافر بنعمة ربنا (يبدأ الرجال فى ضرب رجل 4)
الضل : (لأنيس): قوم أضرب مع الضاربين، كمل عليه (ينهض أنيس ويبدأ فى ضرب رجل 4)
أنيس : إقطعوا ديله، دا تعبان فى أصله وفصله (الجميع يرفعون أدواتهم من أزاميل وفؤوس، وجواريف إلى أعلى تمهيدا للنزول بها على رأس رجل 4.
إظلام
(إضاءة سريعة على شاشة سينما تظهر عنوان في جريدة صباحية : العثور على جثة لأحد العمال في جامع تحت الإنشاء ، تختفي الصورة السينمائية الأولى ، لتظهر أخرى تحمل عنواناً آخر لجريدة أخرى ، أكبر عملية نصب على عشرات من العمال المصريين ، والنيابة تباشر التحقيق).
إظلام
(إضاءة على شقة أنيس وقد امتلئت بشاشات التليفزيون ، وشاشات اللاب توب ، وجميعها تتصدرها صور للضل يضحك في أوضاع مختلفة ... يدخل المحقق وكاتب التحقيق)
المحقق : إكتب ، وقد انتقلت النيابة إلى شقتي المتهمين الرئيسيين ، المدعو أنيس ، وجارته قيمة ، ولم يستدل على أي أثر لهما ، وقد وجدت النياب بضع شاشات تليفزيون وأخرى لكمبيوترات ، وبتشغيلها جميعها في محاولة للعثور على خيوط جديدة في جريمة النصب موضوع التحقيق ، لم تجد إلا صورة لشخصية مجهولة ، أخذت تردد جملاً لا معنى لها (لكاتب التحقيق) دور الأجهزة ياابني ودون كل اللي بتقوله الشخصية المجهولة
الضل : (من خلال الشاشات) الناس بتحول الوهم إلى حقيقة ، لأنهم مش قادرين ولا عاوزين يواجهوا الحقيقة ، تاريخ البشر كله هو تاريخ من الأوهام اللي ورا بعضها ، وياويله ياسواد ليله اللي يحاول يخرج الناس بره أوهامهم
المحقق : يعني إيه الكلام الفارغ ده ؟
الكاتب : العلم عند الله يافندم.
إظلام